政情：范國威為影相同老婆吵大鑊
立法會議員范國威（Gary）擅長畫畫好多人都知，但原來佢對攝影都有一份執着。Gary早前舉行一個活動，其助理攞住部單反相機周圍走，左影右影好似龍友咁幫Gary影相，之後Gary疑似唔滿意，仲親身上陣試影相教助理，Gary及後仲大爆，因為影相試過同太太吵大鑊添！
話對方無耐性 教完都失手
Gary笑言太太比較無耐性，不論係被影或負責影人都好易唔耐煩，佢有次試過幫太太影完相，就叫對方企番同一個位，諗住照住張相影一次，點知太太都係失手，佢自言教人影相，只係想有人幫自己影靚相。
幸好，Gary都有知音人，佢大讚姨甥女乖，教識咗佢滑雪之後，可以孭部運動相機玩，只要自己跟住去滑雪，其姨甥女就輕鬆影低自己嘅英姿喎。