中環出更：同志平權議案自由投票 白鴿黨冇立場？
近年同志平權議題引起外界關注，關注同志平權團體金睛火眼𥄫實各黨派於議會內嘅投票取向，據知首名「出櫃」嘅立法會議員陳志全（慢必）嘅「研究制訂讓同志締結伴侶關係的政策」無約束力動議，最快今日於立法會開始辯論，據悉擁有七票嘅民主黨（白鴿黨），允許出席議員自由投票。
點解白鴿黨容許議員就同志平權議題自由投票呢？據了解，白鴿黨黨團早前開會商討今次投票意向，原則上支持今次同志平權議案，但同時留有空間，就係允許黨員自由投票，有人估計白鴿黨內，本身係基督徒嘅白鴿黨資深議員涂謹申，未必會「開綠燈」支持慢必呢個無約束力動議。
胡志偉話唔使特別申請
白鴿黨主席胡志偉回覆查詢時話，由於決定咗可以自由投票，因此唔需要作出特別申請，佢個人會睇清楚議案嘅內容再作投票決定。
其實白鴿黨都唔係第一次自由投票，立法會於二○一二年討論同志平權議案時，白鴿黨都係容許黨內議員自由投票，當時涂謹申係投下棄權票。此外，當年亦有個別建制派，無跟所屬政黨嘅投票取向，自行投下棄權票，究竟慢必今次嘅無約束力動議會否獲得通過，也許未到投票表決一刻，都仲有唔少變數。
卓妮