中環出更:葉永成日行半個鐘 度橋運動夠輕鬆

近年愈來愈多人關注身體健康,甚至堅持每日做運動鍛煉身體,中西區區議會主席葉永成都唔例外,佢出席一個活動時話,自己鍾意行路,每日都會特登抽半小時出嚟行路,通常會一路行一路聽歌或聽新聞,面對區議會嘅一啲棘手事情時,仲會一路行一路思考對策。唔知佢行路時係唔係思考緊點樣應對區內反斗區議員同事呢?

葉永成尋日出席由一個慈善基金舉辦向長者贈送血壓計嘅活動時話,自己年年都有做身體檢查,血壓都正常,又話後生時鍾意踢波,依家雖然年紀大踢唔到,但都堅持運動,每日都行路半個鐘,覺得出一身汗,人都開心啲喎!

徐英偉自爆去親立會血壓高

另外,同場嘅仲有勞工及福利局副局長徐英偉(Caspar)、基金名譽會長葉俊亨同太太、以及身兼基金執委會主席嘅教聯會會長黃均瑜。其中Caspar自爆其尿酸及膽固醇都偏高,可能同家族遺傳有關,而血壓方面就去親立法會都會高啲,其他時間就正常咁話,唔知立法會有咩人物或事情,會令到佢血壓飆升呢?被問及平日有冇做運動,「升呢」副局長逾一年嘅Caspar,聲稱每星期放假都會同小朋友打欖球,太太就做啦啦隊,因為平日工作忙,所以放假都爭取時間同屋企人一齊。

葉俊亨太太則話依家仔女大晒,佢同老公有多啲私人時間,可以去行山,而且行山行上癮,就連之前去挪威旅行都有行山,笑言佢哋去旅行行多啲,咁先夠「貼地」。

至於黃均瑜亦係行山愛好者,平時行山會計劃好行程同帶齊裝備,不過都有「出事」經歷,就係有次去城門水塘,佢朋友唔小心踩落石澗整傷腳,搞到要搵飛行服務隊求助,而其他冇受傷嘅朋友最後都分別由救護車同消防車接走。

卓妮

第一手消息請下載on.cc東網iPhone/iPad/Android/Windows Phone Apps