政情：曾智明座駕放垃圾桶 長途塞車冇有怕
香港交通擠塞問題嚴重，政府一直都冇解決方案，之前提出嘅「三隧分流」亦備受爭議。作為香港人，相信無論係揸車定係坐公共交通工具，都一定試過塞車，倘若因為塞車而遲大到，都咪話唔麻煩同尷尬。明匯智庫主席曾智明都試過遇上塞車，佢仲話會喺車上放一個有蓋垃圾桶，就算塞起車上嚟，人有三急都唔怕咁話。
行紅隧預足時間
曾智明話，雖然香港都有塞車情況，但佢自己就好少因為塞車而遲到，因為香港嘅塞車時段其實唔難掌握，例如喺收工時間紅隧就肯定會塞車塞到爆，所以佢一係唔行紅隧，一係就提早出發，咁就可以將時間控制得好啲喎。
佢又提到內地塞車情況，話試過喺內地遇上塞車，而內地塞車係冇得預計，根本估唔到會塞幾耐，嚴重起上嚟塞成七、八個鐘都試過，聽落都咪話唔辛苦。而佢似乎都對塞車期間人有三急好有經驗，事關佢話自己經常都會揸長途車，所以車上必備一個有蓋嘅垃圾桶，咁樣就人有三急都唔怕喇。