中環出更：環署邀議員參觀回收中心 得何君堯出席
前日立法會審議將侍產假增至五日嘅條例草案，唔止負責嘅勞工及福利局官員嚴陣以待，議員都唔敢離開立法會。不過，環境局轄下嘅環保署就偏偏安排議員喺前日參觀今年七月落成、位於北大嶼山小蠔灣嘅有機資源回收中心，結果民主派加埋建制派都只係四名議員報咗名，而最後更加只得身兼立法會環境事務委員會主席嘅議員何君堯出席。
陳克勤叫佢唔好去參觀
何君堯話，原本有四名議員報名，包括佢、朱凱廸、鄭松泰同郭偉強，但佢哋三個都甩底，其他議員就只派助理去，批評甩底議員言而無信，環保署預約咗大型旅遊巴，又特登安排人手講解，嘥晒該署心機咁話。佢仲透露，有建制派「副班長」之稱嘅議員陳克勤曾經叫佢最好唔好去參觀，怕侍產假法案投票時唔夠人，但佢就認為「安全系數」好高，加上佢係委員會主席，所以應該要去喎。
查實議員開會長氣已眾所周知，周四續會亦係平常事，加埋仲要審議侍產假呢啲咁重要嘅民生法案，有關方面都唔改期，係咪太冇政治觸覺呢？環保署就回應話，該署在活動前一天才獲悉議員因事未能出席，而且十一月仲要安排多一次議員去參觀添。
卓妮