「有花堪折直須折，莫待無花空折枝。」港珠澳大橋開通第二日，情況比首日更冷清。鬼咩，本港物流業黃金期早就過去，加上三地政府唔爭氣，管理甩漏，配套不全，大橋唔拍烏蠅至奇。
話大橋拍烏蠅真係冇誇張，事關大橋冇嘢多，最多就係垃圾堆旁亂舞嘅烏蠅。嗱，香港旅檢大樓外有多張長椅供旅客休息，唔少人選擇喺長椅用膳，結果引發衞生問題。記者發現長椅沾有食物殘渣，引來烏蠅亂舞，非常滋擾。仲有喎，大樓外垃圾桶數量不足，爆滿又無人清理，莫講話烏蠅，怕且老鼠曱甴陸續有來，問你死未。
最好笑係，港府開口埋口要做智慧城市，偏偏連最基本嘅WiFi上網功能都提供唔到，大樓內外係就係貼滿WiFi熱點告示，但旅客連極都連唔到線，鬧爆「不可思議」，職員則推諉旅檢大樓剛落成，未能提供上網服務喎，有冇再失禮啲吖。珠海口岸嘅網絡信號同樣弱過弱雞，網速慢過烏龜，睇嚟中港兩地海軍鬥水兵，水鬥水咋。
講真，大橋淨係香港部分已耗資千億興建，甩漏竟然多如牛毛，配套唔湯唔水，獻醜不如藏拙，不如推遲啟用冇咁嬲。正如有人質疑，延遲一個月或廿日先至通車一樣得啫，總好過家陣裙拉褲甩咁狼狽吖。好似澳門口岸咁，旅檢大樓一帶仲趕緊工，四處沙塵滾滾，大樓十室九空，旅客想搵地方醫肚都冇，甚至連港澳跨境巴士站嘅標示都係求其搵張A4紙頂檔就算，尋日仲發現花圃漏水添，你話幾咁醜怪呢。珠海旅檢大樓仲衰到九部巴士自動售票機之中，有一部故障，啟用不過兩日就搞成咁，用多幾日咪更加蓉蓉爛爛？
所以話，世界新七大奇迹就冇份嘞，世界級笑話就差唔多。大家有眼見，大橋首日通車只有二千架次多啲，遠遠未能達標，尋日車流量進一步下跌，搵啲人氣睇吓都冇，旅客及司機仲投訴由香港前往澳門嘅過關程序起碼兩粒鐘，費時失事，相信未來使用量只會更低。你話喇，巨額投資回本無期，唔係大白象工程係乜吖。
冇計嘞，回歸以來香港諸事不順，競爭力每況愈下，港珠澳大橋橫空出世，本來可以沖喜嘅，殊不知大橋命途多舛，事故不斷，唔係延誤就係超支。時間唔等人，期間香港物流業不斷衰落，昔日嘅世界第一貨櫃港早就係明日黃花，大橋就算點樣趕通車，都冇可能追番失去嘅光陰喇。
一節見則百節知，市民起勢反對港府興建東大嶼人工島唔係冇原因o架，睇吓港珠澳大橋人影都唔多隻咪知囉，與其倒錢落鹹水海，港府不如繼續做守財奴算罷喇。