超強颱風山竹早前襲港，結果將政府官員手腳慢嘅底牌都吹起埋。好似可以容納超過一萬人嘅小西灣運動場咁，颱風吹襲時竟然入晒水變成大水池，草皮當然爛晒喇！預防工作做唔好都算，當局預計完成維修要等到下年年中，即係最快大半年先搞得掂。政府處理塌樹搬得慢，移走擱淺船隻又無聲氣，估唔到連修復球場都慢吞吞，康文署署長李美嫦又點對得住區內一班波友同晨運客呢？
