政情：今日你上鏡：莫乃光54歲牛一 朋友讚佢似44歲
立法會資訊科技界議員莫乃光（Charles）尋日生日，由於立法會續會，所以都係喺會議中度過。不過，都有議員記得佢生日，同屬專業議政嘅會計界梁繼昌，以及教育界葉建源就同佢切蛋糕，葉建源（右）仲喺Facebook上放咗合照，爆埋Charles（左）今年五十四歲添！
希望來年身體健康
雖然畀葉建源爆咗年齡，但都有朋友留言讚Charles個樣似四十四歲，無喇喇年輕咗十年，Charles仲以「Wakaka（哇哈哈）」咁回應添！有乜生日願望？早排出現突發性失聰嘅佢就希望來年身體健康，仲話雖然依家好番晒，但有時太夜瞓就會出現耳鳴，好似提示佢要去瞓覺咁，所以嚟緊會盡量早啲休息，少啲用電腦。
（互聯網）