政情：綠的唔入沙田醫院 丁仕元問幾時禁止
俗稱「綠的」嘅新界的士一向只可以喺指定範圍內行走，但沙田部分地方唔屬於新界，市民唔可以搭綠的出入。呢個規定由一九七六年綠的發牌開始已經存在，但係沙田區議員丁仕元好似唔知道，仲喺區議會遞交討論文件要求運輸署回覆，由幾時開始禁止新界的士前往沙田大部分地區喎。
根據區議會交通及運輸委員會文件，丁仕元就話綠的只可以去威爾斯親王醫院，但唔可以去沙田醫院，問運輸署幾時開始禁止綠的喺沙田行走，又問過去四年當局有冇收到相關投訴，署方會唔會考慮放寬綠的限制等。但署方回覆就話，引入綠的開始，營運範圍已劃定係沙田以北及荃灣以北，兼且有足夠公共交通服務讓市民往返沙田醫院，所以無計劃放寬限制。
要求放寬限制
丁仕元就話好清楚政策規定，但近日有一位患有腦退化症嘅街坊，無法坐綠的到沙田醫院覆診，但又冇紅的願意接送，最終佢每周親自送街坊去覆診。佢批評政策已經多年無變，應該起碼畀綠的去醫療設施，而尋日區議會亦通過動議，要求政府盡快檢討。