政情：廿蚊張稱被扣帽子 話自己非無良僱主
外號「廿蚊張」嘅立法會飲食界議員張宇人，過去喺多個勞工議題上爆出驚人金句，更被外界批評為「無良僱主」。立法會尋日繼續審議有關侍產假嘅修訂時，廿蚊張發言時就話自己被扣帽子扣咗好多次，反指其他議員批評佢涼薄時，應要照吓鏡，要睇番自己點對待助理，「你嘅侍產假畀咩佢呀？五十二個禮拜呀？」
「幾廿歲仲頂得順」批評
廿蚊張尋日喺會上話其他議員批評佢涼薄、無良僱主，有建制派議員聽完覺得唔公道，想幫佢出吓氣，但佢就話自己「幾廿歲仲頂得順」，仲話好彩自己「耳又聾聾哋、眼又矇矇哋，根本聽又聽唔到、睇又睇唔到」，所以冇乜大問題。
佢仲解釋，話飲食業界反對立法強制增加福利，原因係會加重中小微企嘅負擔。佢亦重申，依家唔係有良定無良嘅問題，而係有能力同冇能力嘅問題，僱主如果有能力，唔需要強制立法都會做。佢仲話依家香港人手短缺，僱主冇能力嘅話，冇一兩個人手都會叫晒救命，同時佢仲批評依家面對勞工團體不斷叫價，中小微企生存條件每況愈下，令香港競爭力難以維持。
對於佢之前講過話「侍產假一日都唔應該有」，佢就喺會上澄清話冇講過，而係有傳媒訪問佢時，透過剪接而得來。同時，佢仲話自己「廿蚊張」依個稱號可以幫傳媒吸引注意力，所以對新聞自己都有啲貢獻喎。