政情：撤強積金對沖前哨戰 勞處開位闖關勢危

開位建議已延一年

政府喺今年三月提出取消對沖建議嘅方案，勞資雙方討論多時仍無結果，至本月初政府決定延長對僱主補貼期至廿五年，補貼金額亦由一百七十二億元增至近三百億元，稍為平息商界怨氣。而為咗盡快展開工作，政府喺本月向立法會遞交建議，喺勞工處開設一個常額職位嚟負責取消對沖事宜。據悉，勞福局早喺舊年年底已有意申請開位，只係當時大部分建制派議員都表明不支持，令開位建議延遲一年。

政府消息人士透露，新方案推出後商界反應正面，連帶部分有商界背景的議員，態度較舊年底軟化，先決定盡快將開位建議上會。

鍾國斌：實唔會畀喇

綜合各方消息，勞福局喺月內再向各黨派「摸底」，建制派以民建聯內部分歧最大，有部分議員堅持要求設立基金池，該黨以進出口界議員黃定光（象哥）不滿度最高；自由黨黨魁鍾國斌更明言「實唔會畀喇」，據悉該黨或拉攏象哥、獨立建制派「六人組」等合作，擴大反對勢力；而建制派中，唯獨工聯會已表態支持，成為今次「開位戰」嘅中流砥柱。

民主派方面，民主黨、公民黨、專業議政等冇強烈原因或誘因要反對，令勞福局重點游說投放喺工黨張超雄同議會陣線。據悉，議會陣線以區諾軒對取消對沖有最多想法，勞福局多次邀約區會面游說，而區仍未有決定係咪支持，但佢嘅決定將牽連到其他議會陣線成員嘅投票意向。

現時人事編制小組委員會有三十三名委員，建制派有廿一人，民主派則有十二人，其中民建聯手握七票成眾黨之最，如勞福局未能游說該黨全票支持，相信開位建議勢難過關。就算政府願意「落水更深」，商界獲利後仍要阻撓開展工作，怕且落實取消對沖嘅日期亦會逾拖逾遲。