中環出更：麥美娟抱阿王「骨肉」開會
立法會尋日審議將男士侍產假增至五日嘅條例草案，仍係「黃花閨女」嘅議員麥美娟（Alice）就抱住個「BB」入立法會會議廳開會，呢個「BB」仲係同屬工聯會（工記）立法會前議員王國興（阿王）嘅「骨肉」，Alice仲大爆話：「BB有王國興嘅汗味！」令全場都好驚嚇。
其實呢個「BB」係阿王出任議員時，爭取侍產假時用嘅道具公仔，所以Alice就認為喺立法會再審議侍產假嘅時刻，要帶埋「BB」嚟聽喎。
「有王國興嘅汗味」
睇番資料，阿王確係曾經喺立法會開會時抱過「BB」開會，但「BB」身上嘅衫唔同咗，但Alice就聲稱「BB」有阿王陣味，坦言件BB衫好耐冇洗，攞去驗DNA都唔知驗到啲咩咁話。佢又話雖然阿王已經冇做議員，但係「BB」一直喺阿王以前嘅辦公室、即依家工記勞工界議員陸頌雄嘅辦公室中「供奉」，而尋日都特登畀「BB」坐番阿王以前喺會議廳嘅座位、即係依家工記立法會議員郭偉強個位。
卓妮