中環出更：赴蒙古國攝金鷹節 李秀恒：去一次唔夠皮
蒙古國每年十月舉行嘅金鷹節，近年甚受海外攝影發燒友歡迎。熱愛攝影嘅中華廠商聯合會永遠名譽會長李秀恒，早前都同香港內蒙古社團總會會長海峰嶺（大海）一齊去開眼界。李秀恒話今次係第一次去蒙古國，認為當地嘅草原生活風貌比內蒙古保持得更好，但係由於地方太大，一次睇唔晒，所以計劃再去過。
金鷹節係哈薩克族人馴鷹進行打獵嘅競賽，馴鷹文化已被聯合國教科文組織列入非物質文化遺產名錄。本身係蒙古族人嘅大海對草原生活十分熟悉，所以繼帶李秀恒去內蒙古、烏克蘭影相之後，兩人再次踏上征途，先由香港搭機到蒙古首都烏蘭巴托，然後驅車到舉行金鷹節嘅巴彥烏列蓋市，當地係蒙古國唯一有哈薩克族人聚集之地。
為影靚相 日趕廿多公里路
負責安排行程嘅大海話，近年金鷹節有大批歐美遊客蜂擁而至，導致機票一年前就售罄，酒店亦難求。今次佢哋住喺一位哈薩克族朋友屋企，每日趕廿多公里路周圍影相，包括烏蘭巴托知名嘅成吉思汗博物館等名勝，相當難忘。大海笑笑口話今次碌咗好多人情卡，真正體驗咗「在家靠父母，出外靠朋友」嘅老話喎。
值得一提嘅係，今次佢哋見到已成國際「明星」嘅哈薩克族馴鷹少女。大海話，幾年前，當嗰個馴鷹少女十三歲時，突破咗女性不能馴鷹嘅傳統，唔止參加比賽，更加取得冠軍，成為全世界最年輕女馴鷹冠軍。消息被國際媒體廣泛報道後，女孩聲名大噪，金鷹節亦廣為世人知。今次呢個年輕嘅馴鷹女將都特意現身支持家鄉，佢策騎馴鷹嘅英姿，自然被李秀恒嘅鏡頭成功捕捉喇！
卓妮