施政報告出爐，全城鬧爆「假大空」，特別係「明日大嶼」計劃，萬億儲備分分鐘掟落鹹水海，市民唔嬲就假。咁又係吖，港產官僚連風災後清理塌樹呢挺手板眼見工夫都搞唔掂，未學行先學跑，人唔笑狗都吠喇！
超強颱風山竹災後超過一個月，斷樹殘枝仍然堆滿大街小巷，時值深秋風高物燥，大堆「惹火尤物」儼如一個個計時炸彈。好似杏花邨咁，一截截斷枝連樹葉堆晒喺行人路邊同花槽上，附近山坡早幾日引發火警，雖則虛驚一場，但居民食驚風散都食到飽；大埔街頭亦有樹枝懷疑被煙頭辣着，好彩有熱心市民幫手撲熄，否則後果不堪設想。
最離譜都仲係啟德臨時堆樹區，當初樹木專家已經警告，話枯樹混雜垃圾堆放好易腐爛，應該另覓園林資源再生區，等樹木可以自然分解，點知你有你講，環保官僚睬你都有味，長命工夫長命做，家陣堆樹區枯木堆積如山，結果又係落得堆填下場。最大鑊嘅仲係，該區鄰近多個工地，一旦祝融光顧，隨時火燒連環船都似。
難為發展局官僚仲好意思出嚟邀功，話已經完成首階段涉及阻礙市民同車流位置嘅清理工作，唔該聽吓前線工會點講先啦。佢哋狠批當局協調不足，導致群龍無首，部門間互相卸膊不特止，連增聘外判人手都好似食咗十擔豬油咁款，要清理全港所有塌樹枯枝，起碼仲要半年時間，真係唔得佢死！
話時話，港產官僚互相扯皮，三個和尚冇水飲，早就係特衰政府嘅痼疾。樹木辦成立多年，開位攞資源就叻，幾時見做過實事？話就話協調各部門工作，但每次出事，各衙門例牌又係你賴我我賴你，試過有次塌樹，樹頭壓喺公眾街道，樹腳壓喺公園範圍，結果食環署、路政署、地政總署、康文署等部門個個推莊，冇人肯認頭；至於樹木辦呢頭驗樹、嗰頭冧樹，市民更加見怪不怪。廢官胡混度日、得過且過咯喎，自然好似梅菲定律所講，由選擇樹種、栽種、保養、檢測……凡係可能出錯嘅環節盡皆出錯，有乜法子唔死得人多。
一滴水可以睇穿整個世界，一棵樹亦可以睇透官場廢柴。講到蝸行龜步，清理塌樹枯枝只係冰山一角，由大型基建項目到清除「南亞村」治安毒瘤，港府有邊瓣唔係拖得就拖，Hea得就Hea？
冇計喇，弱將手下無強兵，港產官僚大事做唔到，小事做唔好，市民高薪養廢，直頭冤過竇娥。咪話唔提醒吖，家陣香港頭頭碰着黑，十足十撞邪咁，連港鐵都可以四線齊冧，官老爺清樹繼續掉以輕心，遲早引火燒身一鑊熟嘅咋！