維港渡海泳今日舉行，環境局局長黃錦星尋日就發表網誌，提到維港渡海泳曾經因為水質欠佳而停辦，但隨住淨化海港計劃嘅分期落實，維港嘅水質已經逐步提升，仲話會繼續努力提升維港沿岸水質咁話。黃一味強調要改善維港水質，但對其他地區水質問題就闊佬懶理，好似屯門河臭味擾民，而城門河火炭明渠繼去年有數千條死魚浮屍河邊，今年就變做綠色「螢光河」。黃只係顧住維港水質，唔知佢又夠唔夠膽游出維港以外，跳落臭河感受吓居民日日面對嘅苦況呢？
