政情：電子屏幕唔准郁 楊全盛轟法規僵化
資訊科技發展迅速，就連好多廣告都採用互動模式，但法例就未有與時並進，限制多多。香港電競總會會長楊全盛（Eric）話，近日喺四十幾個巴士站搞咗電子屏幕廣告，但發現面向馬路嗰邊嘅廣告係受法例規管，就算裝咗電子屏幕，個廣告都唔可以郁動，即係變番普通平面廣告。
籲政府配合廣告發展趨勢
Eric話，巴士站採用電子屏幕廣告，好處係唔使派人手限時限候更換膠片廣告，只要撳個掣就換到，依家一個屏幕仲可以展示多個廣告添。佢又話，雖然馬路駕駛安全好重要，但面向馬路嘅廣告竟然係百分百唔可以郁動，即使係展示一碗飯上面有少少煙識郁，呢啲咁輕微嘅郁動都唔得。
佢認為，下一代嘅廣告全部都係互動屏幕或影片賣廣告，全部都係會郁動嘅，某程度上，政府應該諗吓修改法規去推動及配合業界嘅電子廣告發展。