政情：文錦歡肩負重任 提升女性話事權
雖然女性嘅社會地位已提高咗好多，但比起男性嘅社會參與度，似乎仍未足夠。早前喺一個活動上見到國際獅子會前國際理事文錦歡（Teresa）好忙，原來係忙緊一個國際任務，幫手提高該會女會員嘅比例，目標係由現時唔夠三成提升至五成，聽落都覺得任務繁重。
新聲音計劃 八女幫手做領導
獅子會係全球最大嘅慈善團體，成員多達一百四十萬人。Teresa話今年該會邁入一百零一年，首次有女性擔任國際總會長，呢位女會長係冰島人，並倡議一個名為「新聲音」嘅計劃，希望畀多啲機會女性做領導，同埋提高獅姐嘅比例。為咗達到上述目標，女會長喺全球搵咗八個女性幫手，Teresa就係其中之一，負責東南亞區工作，係「新聲音」東南亞憲章區主席。
Teresa笑笑口話，現時該會男女會員人數不平衡，七成以上係男性，希望最終可以提高到各佔一半。幾年前Teresa出任國際理事時，係首位華人女性躋身呢個最高決策層，相信今次勝任有餘喇。