政情：三隧分流各表態自由黨疑爆內訌

香港道路網四通八達，目前有三條過海隧道，包括紅隧、東隧及西隧，但因為荒謬嘅收費差距令紅、東兩隧日日塞爆。今年施政報告嘅三隧分流方案就提出「紅、東隧加，西隧減」，較多駕駛人士使用嘅紅隧、東隧收費會分別加到四十元，西隧就由七十元減至五十元，明顯係向經常使用紅隧同東隧嘅市民「荷包」開刀。

易志明表支持 黨內狂收投訴

當民主派同建制派不約而同對方案有保留時，自由黨竟然表明支持，令唔少政界人士心內有個問號，政圈耳語易志明公開表示支持時，該黨內部仍未開會討論係咪支持，搞到有黨友當晚狂收電話被「投訴」，話方案係向中產開刀，叫該黨唔好支持，此後該黨議員都明顯冇正面回應呢個議題。

僅反對方案 加價或致反效果

問到係咪真係支持三隧分流方案？Felix用肯定眼神話該黨係「支持三隧分流」，但唔係支持個方案，仲話以原價計三條隧道過海費總額只需一百一十五元，方案就要一百三十元，帳面多付十五元，反問點解要向市民攞錢嚟搞分流，又話加咗可能三隧一齊塞，唔一定做到真分流。佢話，唔少揸車嘅朋友都話現時用西隧係用錢買時間，確保準時過海，一旦加價分擔小部分人流，就大家一齊捱貴隧道費兼買唔到時間，所以冇用。

易志明回覆查詢時，承認未同Felix商討三隧分流嘅取態，而佢就重申支持政府方案，並指到二○二○年中環灣仔繞道落成，經西隧去港島嘅車輛就唔會被紅隧出嚟嘅車龍影響，減價下相信有更多司機使用；而紅隧加咗價相信亦會減少車輛流量，最終可以達至分流目的。其實拗嚟都無謂，根本個方案好難喺立法會通過到，睇嚟要等到二○二三年西隧專營權屆滿後先有得搞喇。