中環出更：張國鈞多職在身 葉劉再增掛名組織
唔少立法會議員身兼行政會議成員，若工作太忙都會「減磅」減少公職，但同時為中西區區議員嘅「三料議員」張國鈞（Horace）反而「增磅」任職三間公司嘅獨立非執行董事同非執行董事。咁多公職同職務在身，Horace會唔會應接不暇，搞到兩頭唔到岸呢？
張申報三公司非執董
根據行會非官守成員嘅個人利益申報資料，Horace就分別喺今個月五日同十二日申報成為恆益控股有限公司獨立非執董、以及新經濟股權交易平台有限公司非執董。而佢亦都喺今年八月二十七日申報咗成為創陞（控股）有限公司獨立非執董。睇番網上嘅資料，創陞（控股）係喺二○一四年成立，今年九月上市，係本地金融及證券服務供應商，而恆益控股就係本港建造項目設計、製造、供應及安裝鋼鐵以及金屬產品嘅工程公司，該公司亦都喺最近招股。Horace話十月申報嘅兩間公司都係朋友嘅公司，因為只係做非執董，三個月先去開一次會，佢亦都只係幫手睇吓文件，有問題就指出，好輕鬆咁話。
同樣係行會成員兼立法會議員嘅葉劉淑儀亦係唔少組織及團體嘅榮譽會長或榮譽顧問，佢喺本月四日就再申報多九個有關團體及組織喇。話時話，葉劉掛名咁多組織，會唔會忘記咁啲呢？
卓妮