中環出更：張心瑜終圓夢 生日派對喜得契女

Fiona笑笑口話，佢經常同人講佢有兩仔一女，早幾年佢仲去美國認真研究「整」個女出來，但係被兩個仔勸阻，大仔仲應承即刻結婚生仔，生到佢滿意為止。

生日禮金悉數捐贈理大

依家Fiona已有兩名孫仔孫女，但係仍然恨有個女。佢話覺得同Cisy好夾，磁場好近，所以就決定正式上契。相信今個生日令佢畢生難忘喇。當日去分享喜悅嘅城中名人有好多，包括保良局前主席陳細潔同家姐劉陳小寶、總理顧東華及仁愛堂等慈善機構中人，仲有香港理工大學校長唐偉章等教育界好友。唐仲有一張大支票收添，皆因Fiona將收到嘅生日禮金悉數捐贈畀理大。

劉堃（中）坐住輪椅現身，魏麗霞（左）及好友關俊華（右）都好關心佢嘅病況。

張心瑜（左）飲契女Cisy（右）奉上嘅茶，甜到入心。（余素月攝）

講起難忘嘅生日，唐偉章話年年生日都好難忘，因為佢同女兒係同月同日生。至於陳細潔就經歷過充滿「驚嚇」嘅生日，佢話有次一位男性朋友突然喺佢嘅生日派對上求婚，不過對方連男朋友都唔係，形容呢個做法好老土，所以對嗰次生日勁難忘囉。

劉堃整親腳 坐輪椅出席

出席派對嘅仲有民政事務局前常任秘書長李麗娟兒子劉堃、「家品女王」魏麗霞等人。卓妮見劉堃雙腳戴住腳托、坐輪椅現身，原來佢早前打波整親一隻腳，但冇特別休息就返工，結果另一隻腳因為負荷太大而傷埋，於是就搞成咁喇。

卓妮