政情：不認還須認 王維基入紙娶袁莎妮
香港總商會總裁袁莎妮（Shirley）早幾年被揭發與有「電訊魔童」之稱嘅港視主席王維基一齊到大坑「撐枱腳」食甜品，當時Shirley仲話大家係「朋友啫」。輾轉數年，不認不認終須認，現年五十六歲嘅王維基日前正式入紙登記同四十八歲嘅Shirley拉埋天窗！Shirley回覆查詢時話，多謝大家關心，但忙緊處理施政報告回應，未有時間講更多。
友人爆料 戀情曝光
感情生活向來低調嘅王維基，與前妻唐靄玲結婚廿幾年，兩人育有一對仔女，至年前離婚。近年不時有傳媒影到王同Shirley行孖咇去街，或出席公開場合，但兩人一直無親口承認戀情，至去年兩人一齊出席友人飯局時，先被友人爆料，將兩人戀情正式曝光。
除咗電訊業界外，因申請免費電視牌照觸礁，再加上喺一六年時曾經參加立法會選舉，令到唔少人都認識王維基。而佢嘅準太太Shirley背景都唔弱，喺英國牛津大學畢業後回流香港加入政府，喺○二年出任工商及科技局局長嘅政務助理，到○六年就擔任副行政署長，一○年就任職運輸及房屋局副秘書長，同年離開政府，翌年獲聘任為香港總商會總裁。