中環出更：落地玻璃難耐強風 蔡少森：唔使斬腳趾避沙蟲
破壞力強勁嘅颱風山竹吹襲後，引起各界好多反思，包括起樓係咪需要用咁多落地玻璃去增加時代感或豪華感。早前喺一個酒會上見到中華廠商聯合會常董蔡少森，佢啱啱躋身地產商行列，首個住宅項目正在籌劃中，問佢需唔需要重新檢討設計方案，減少啲落地玻璃？佢笑笑口話唔使，只要用高質量嘅玻璃就得喇！
蔡少森話用落地玻璃冇問題，最緊要係質量同施工做得好，實際上好多落地玻璃都頂得順今次超級颱風。佢話全球暖化導致颱風愈嚟愈勁，以前就話五十年一遇，日後可能一年一遇都未定，所以佢認為起樓嘅各種安全系數要提高，咁就唔使「斬腳趾避沙蟲」。
周厚立：公司文件要做電子備份
當日係潮屬各界舉行酒會，出席嘅仲有潮屬社團總會（總會）主席陳幼南同會長周厚立等人。講起風後反思，周厚立都話得到啟示，就係公司文件要做電子備份。事關今次有寫字樓被風吹爆晒玻璃，啲文件滿天飛舞，見到呢啲情況，相信做老闆嘅都冇眼睇啦！
冇眼睇嘅仲有博愛醫院前主席蕭成財，佢喺中山有個相當於五個維園咁大嘅太空種子示範基地，喺今次風災中全部浸晒，損失數以百萬元計。至於喺香港嘅損失都有十幾萬，事關佢有幾間電器連鎖店，休息一日就唔見咗十幾萬元嘅人工同埋租金喎。
總會副秘書長鄭敬凱同會董林月萍都喺度，鄭敬凱着住條綠色長褲，原來當日係佢六十歲生日，跟住要趕場去開「登陸」派對，所以咪着條綠色褲囉！
卓妮