環境局局長黃錦星推行環保眼高手低，至叻就係擾民，其次就係向市民開刀，乜都要徵費：膠袋，徵費！排污，徵費！四電一腦，徵費！遲吓連飲品膠樽、玻璃樽都要徵費！阿星哥搞環保，除了寓禁於徵，根本就別無他法！庸官搞環保，除了擾民還是擾民！
至於近排推出嘅「四電一腦」，完全係冇腦，搞到天怒人怨，本報「正論」分析甚詳，指政府推行政策欠缺全盤規劃和配套支持，以為一間欽定的歐綠保回收商足以支持全港回收需求，誰知歐綠保位於屯門環保園的儲存場地好快爆滿，新接收的廢電器只能移師前九龍灣綜合回收中心，但該中心很快又「電滿為患」！
事實上，政府一邊叫人源頭減廢，一邊卻做大嘥鬼，好似颱風山竹襲港，政府開放多區臨時庇護中心讓有需要市民入住，然而風災過後，有網民發現位於鯉魚門的庇護中心，竟將大量看似完好的物資丟到垃圾站，當中有床墊、毛氈等，有些甚至未拆封，唔通佢哋嫌外面啲冧樹雜物唔夠多？
香港人的環保意識，老朽唔敢講冇進步，不過港人真係好捨得丟棄家中用品，簇新的家具、家電常見堆滿垃圾站。黃錦星如果用個腦諗吓，應該知道一個回收商有乜可能足以應付全港回收需求？再不亡羊補牢，廢電圍城好快就到！
「四電一腦」未推出前，老朽所居之鄉村，垃圾站偶有棄置的雪櫃、電器等，然而有個拾荒阿伯每早巡視，佢會將這些棄置電器推去一間廢紙廢鐵收集站，相信可以搵三、四十蚊。可是，自推出「四電一腦」後，由於回收場無法符合廢物處置牌照要求，已停止接收呢啲電器，阿伯如今可謂冇啖好食！而每當收垃圾工人見到棄置的雪櫃、洗衣機等大型電器，會一邊用大鐵錘敲擊一邊大罵，老朽不禁撫鬚苦笑：天下本無事，庸官自擾之！