政情:公民講場:黃家和:冇巴士就搭小巴 風災後扣員工假

颱風山竹過後,數以萬計打工仔冇車搭嘅情況,相信大家仍歷歷在目。香港餐飲聯業協會會長黃家和尋日出席一個論壇時,堅稱十號風球翌日大部分員工都返到工,但係有幾個住荃灣嘅員工返唔到葵涌公司,所以不能不扣假。現場有嘉賓提佢話當日巴士停駛,佢仲反問話「小巴呢?」激到同場嘅立法會議員楊岳橋冇好氣咁,問佢對上一次搭小巴係幾時?查實當日小巴站要排幾個鐘先上到車,聽聞仲有小巴收兩百蚊一位,加上周街冧樹阻住主要幹道,搭的士都冇路行,返工要披荊斬棘,難怪佢被轟「離地」囉!

第一手消息請下載on.cc東網iPhone/iPad/Android/Windows Phone Apps