政情：梁美芬暑假勁減十幾磅 舊衫着得落
立法會議員梁美芬最近頻頻露面，明顯瘦咗好多。原來佢趁暑假減肥，兩、三個月瘦咗十幾磅，依家嘅體重同啱啱做議員時差唔多，連當年買嘅衫都着得番添！
相信大家都好想知佢嘅減肥方法，梁美芬話搵咗營養師整餐單，盡量減少食碳水化合物，仲要同全脂牛奶講拜拜，轉飲脫脂奶或豆奶。運動都好重要，佢好勤力咁一日做兩次運動，例如跑步，仲會趁放狗期間，同狗仔一齊跑。照咁講，唔知狗仔有冇瘦到呢？仲有，依家會少咗搵司機車佢出街，特登由屋企行四十五分鐘去港鐵站搭車，乘機行吓路。
復會應酬「食少啲乳豬」
早幾日佢帶媽媽搭高鐵到肇慶玩，見佢影咗啲相，真係瘦咗好多。不過佢話，立法會休會期間少咗應酬，所以容易控制飲食。咁復會後有番應酬之後點算？佢就話惟有食少啲乳豬喇！