政情：撐延長產假遭誤解 羅致光大呻明屈

澄清同增加生育率無關

羅致光話，八月份提出延長產假嘅議案時，已講過延長產假能否增加生育率難以預料。但係事後仍有唔少報道夾硬話佢認為延長產假可以增加生育率，而且仲笑佢嘅「說法」添。佢就澄清呢個說法只係唔少人「想當然」嘅估計，依家只可以肯定延長產假唔會減低生育率。

佢仲大呻話無論係「明屈」、誤解又或者係斷章取義，佢都視為係「常態」，只可以喺適當嘅時候作澄清咁話喎。佢仲為另一個誤解澄清，指唔期望透過延長產假增加女性勞動嘅參與率。延長產假只係希望為懷孕婦女提供一個基本保障，同埋達至國際勞工組織嘅要求。其實咁簡單嘅一件事，搞到畀人屈咁複雜，不如下次講嘢再清楚啲喇。