中環出更：白鴿反音樂噴泉 胡志偉遲到「罰企」
觀塘海濱音樂噴泉項目備受爭議，立法會復會後或直闖財務委員會以取得撥款。民主黨（白鴿黨）九龍東團隊尋日公布一項民意調查，話不足一成市民支持興建噴泉喎。最好笑係該黨主席、九龍東立法會議員兼黃大仙區議員胡志偉遲到，全程冇位坐要靠邊站，好似罰企咁，真係失晒威喇！
主動攞咪先有得發言
調查訪問咗六百九十五位市民，選項只有改善醫療同埋起噴泉兩種，結果九成幾人支持改善醫療。點解選項得醫療？該黨觀塘區議員鄭景陽解釋話，區內人口老化同貧窮問題嚴重，而且好多人重視醫療，所以覺得筆撥款可以撥做醫療用途。該黨社區主任梁翊婷更稱，元朗天價天橋都係民意不足要抽起，所以敦促政府收回噴泉項目，否則會到立法會申訴部投訴。
發布會仲發生一段插曲，話說胡志偉遲到咗六分鐘先到場，眼見台上座位都坐滿，只好企埋喺台邊。最後主持人宣布活動完結，都冇招呼胡志偉講兩句，要佢主動上前攞咪先至有得發言。呢班後生仔咁唔識做，搞到主席好瘀啫！
卓妮