中環出更：彭徐美雲二胡學唔成 意外發掘老公音樂天分
每個人都有潛能待發掘，前九龍城區議員彭曉明就有一段有趣嘅經歷。早前國際婦女會主席彭徐美雲同埋胡琴大師霍世潔攜手舉辦一場慈善音樂會，彭太講起幾年前曾經跟隨霍世潔學二胡，但係上咗兩堂就放棄，估唔到陪住佢上堂嘅老公彭曉明反而可以拉成首樂曲出嚟，於是就變成老公一直學到依家喇。
彭太講起呢段軼事仍覺得好笑，佢話當時上咗兩堂後，手指好痛，加上拉二胡要剪晒啲指甲，笑言係好大犧牲，所以就投降喇。雖然自己學唔成，但係就發掘咗老公嘅音樂天分。咁點解彭曉明今次唔齊齊上台表演呢？彭曉明就笑稱，今次有好多霍世潔嘅學生一齊表演，佢資歷咁淺，如果拉得唔好就失禮人，如果拉得太好就……所以都係算喇！好搞笑！
當晚有唔少現任或退休官太為慈善而獻唱，包括保安局局長李家超太太Janet。平時打扮樸實嘅Janet難得化濃妝，個個都讚佢靚，仲叫佢日後多啲化妝。懲教署前署長單日堅及太太Carmen都有獻唱，Carmen瘦咗又靚咗，狀態好Fit，原來係湊孫湊到瘦，講起孫女就開心笑到見牙唔見眼。
單日堅講投資 頭頭是道
今年年初單日堅到一間華資金融集團任職，負責企業管治。記得初入職時，佢同卓妮講過唔係好識投資，但係依家明顯專業好多，講起中美貿易戰下投資者應該點樣投資，頭頭是道，成個財經佬咁款。
呢班靚太嘅歌唱老師楊良才都有到場，個個同佢學唱歌閒閒哋逾十年。Janet話老師好好人，有時覺得自己唱得唔好，但係問老師意見，老師一定話唱得好好喎！
卓妮