政情：新東撞區 白鴿內訌 柯耀林數臭林卓廷

雙牌頭風波 柯或提上訴

事件爆發點係關注組成員、區內業委會副主席李栢棠，同白鴿黨員莊榮輝都有意落戶將軍澳都善選區，引發白鴿黨嘅雙牌頭風波。柯耀林話，已接獲黨秘書處通知，要喺三個月內回覆揀咩牌頭，喺忠義兩難全下，佢唔會放棄關注組，但或會提出上訴。據悉，白鴿黨新界東約一半黨員或會一齊退黨，包括大部分舊前綫系黨員及白鴿黨社區主任。

關注組成員、西貢區議員陸平才就話，關注組早喺○三年已經有組員參選，如果要列做參政團體，點解十幾年前唔做呢？合作得咁好先嚟搞，係咪要將關注組割裂出去？陸又話，睇唔到白鴿黨有人有心服務將軍澳嘅街坊，佢不點名指有人向外聲稱做咗好多嘢，其實係為撞區而撞區，做法非常霸道。

對於莊榮輝聲稱不知業委會有人正考慮參選，關注組攞出多份證明，早於去年已去信負責協調嘅民主動力，表明有組員有意落戶都善選區。柯又展示該黨西貢黨團召集人林咏然向支部發信，講明人民力量喺該區有優先權，又未知對方係咪放棄，對莊揀嘅區有保留。

柯耀林仲爆料話，林卓廷曾向佢講「唔好搞莊榮輝嗰區，其他讓畀你」，而莊榮輝又同佢講「我要擺把刀落你哋條頸度」。柯稱成件事關注組都係被動，如果件事因為撞區而起，係白鴿黨撞關注組就真。

林反指柯有違政治倫理

林卓廷回覆指控時重申，事件只係避免黨員因雙重會籍出現嚴重角色和利益衝突，認為柯公開披露黨內部會議內容，正好印證利益衝突問題，有違政治倫理。莊榮輝則重申，事前唔知業委會有人考慮參選，佢唔會亦唔可能勸退任何人。

白鴿黨主席胡志偉亦喺駡戰升級後發出聲明，指關注組近年由地方團體發展愈趨政黨化，將來必定引起嚴重角色及利益衝突，將其列入參政團體係該黨選舉委員會同中央委員會經過多月商討嘅決定。