政情：風災襲村郊 鄉議局設善後小組自救
超強颱風山竹吹襲後，香港滿目瘡痍，至今超過一周，但市面仍未完全恢復正常，偏遠鄉郊情況就更加惡劣，村民要自救，鋸樹開路。新界鄉議局亦已成立風災善後小組，協助村民重建家園及提供援助。
供電仍不穩 垃圾積如山
鄉議局執委會原定喺上星期二舉行，但因應風災過後不久，唔少鄉紳需要善後而押後到尋日舉行。鄉議局主席劉業強亦有去過視察災情，亦聯同相關部門去受災最嚴重嘅西貢北同沙頭角，包括東平洲、吉澳、荔枝窩等，發現仍然滿目瘡痍，好似道路中斷、水電供應不穩、垃圾堆積如山等，明言期待外界援助，亦要求相關部門盡快清理、修復同重建鄉郊。
另外，劉業強又話廿七鄉鄉事委員會都有做好防災工作，有好多鄉委會職員要廿四小時輪更工作，亦有鄉委會主席出錢出力幫助災民，風後又要帶領村民自發清理障礙物。睇嚟偏遠鄉郊嘅善後工作，又係一個靠晒市民自救先搞得掂嘅實證。