政情：衰多口評民族黨 湯家驊避席上訴委員會
港府喺本周一刊憲，禁止主張港獨的香港民族黨運作，仲列為非法社團。民族黨可於三十日內，向特首林鄭月娥同行政會議成員提出上訴。行政會議成員、資深大律師湯家驊（大口湯）尋日同傳媒茶敍時，被問到有關民族黨事件，佢即刻自爆已向林鄭月娥指自己「實在講得太多」，主動提出避席上訴委員會。被問到避席會少咗一票，佢就話「多我一票唔多」，認為對最終決定冇太大影響。
喺電台Fb屢作批評
警方喺七月中時建議保安局引用《社團條例》，禁止民族黨運作。喺取締民族黨前後，大口湯亦多次就事件接受傳媒訪問，包括喺七月底嘅電台節目上，就民族黨事件解釋社團條例、八月中民族黨召集人陳浩天喺香港外國記者會發表演講後，亦就其言論發表意見，指言論反映陳對中國有敵意，而喺本月初佢亦喺Facebook上批評陳對港府憤怒同仇恨，日前亦指政府嘅做法引起阻嚇作用，並指香港眾志嘅綱領同民族黨有距離，睇唔到政府有需要取締眾志。