政情：退出反港獨聲明陳沛然進退失據

遭醫學界怒轟 Fb耍冧致歉

港府喺星期一中秋節正日刊憲，禁止香港民族黨運作，建制派議員亦發聯合聲明表示支持，而自我定位為中間派嘅陳沛然「後加」參與聲明，即時引起業界嘅不滿，當中唔少非建制派更對佢嘅做法破口大罵。例如公立醫院內科醫生同杏林覺醒成員黃任匡，就炮轟陳「唔出聲冇人話你啞o架喎」、「說好的中間超人呢」，講到明最嬲佢一邊話自己中立，又衝出嚟簽建制派聯署咁話。

眼見業界強烈反彈，陳沛然前日即喺Facebook為加入建制派牽頭嘅反港獨聯合聲明致歉。不過致歉似乎未能撲火，結果佢尋日「跪低」，宣布退出聯合聲明，但同時不失「中立」作風，一方面重申自己反對港獨，另一邊廂強調會竭力維護《基本法》第二十七條賦予港人的各項權利同自由。至於點解退出呢，佢就無交代嘞！

陳克勤反駁「倉促同意」說法

負責草擬聯合聲明嘅民建聯（民記）立法會議員陳克勤回覆本報查詢時話，無收過陳沛然退出聲明嘅通知，亦唔清楚有無退出機制，指成件事好奇怪，佢亦對陳沛然喺反對港獨呢個議題上進退失據感到可惜。陳克勤又話為遷就對方將聲明嘅抬頭，由「建制派立法會議員」，改為「三十五名立法會議員」，認為對方已仔細了解聲明內容，反駁對方倉促同意嘅說法。

同樣係民記嘅葛珮帆亦指陳沛然係自願參與聲明，直言「議員豈能出爾反爾」，對陳懷疑受壓下退出感到可惜。有建制中人就形容今次被陳沛然「跣」咗一鑊，話建制陣容同陳無咗互信。泛民唔當陳沛然係自己友，依家建制又有怨言，喺咁嘅情況下，佢真係兩面不是人。