中環出更：葉思貝行慈善花生騷3個月搣6磅
貪靚嘅女士永遠覺得自己再瘦啲就更完美，做過博愛醫院總理嘅香港愛馬女士協會（協會）主席葉思貝都係「走脂派」，佢原本已經好高瘦，成個衣架身形，但為咗親自上陣行花生騷，三個月內再搣走六磅，認真有毅力。
其實花生騷只屬慈善性質，係早前協會同一個高檔男裝品牌合辦嘅慈善時裝表演。葉思貝笑言自從三個月前知道要行騷後，好緊張，雖然自己已經算瘦，但為咗着衫效果靚啲，就開始節食同做運動減肥。佢笑稱，當日有份行騷嘅騎師太太或女友，個個都有減肥o架！
收益幫補低收入家庭
協會副主席胡珮君、總理徐藝載同區結玲等人都喺度，胡珮君話今次籌款嘅受益機構係匡智會等三個慈善組織，主要係想幫補吓學童嘅開學支出，減輕低收入家庭嘅負擔。講起開學支出，徐藝載Creamy感慨話，依家乜都貴，好似想買個有護脊功能嘅書包要成千蚊。區結玲都話學童又要剪吓髮、配吓眼鏡咁，加加埋埋真係唔少錢。
九龍樂善堂副主席彭志宏同身兼百仁基金理事嘅太太王文博都有到場，事關彭志宏係其中一個受益機構代表。佢哋有兩名讀緊幼稚園嘅小朋友，書簿使費仲未係好大。
彭志宏笑笑口話，第日仔女可以用佢啲筆，因為佢係整形外科醫生，經常有藥廠送一蚊支嗰啲原子筆喎。講開兒女經，王文博自爆已有喜四個月，明年抱豬BB，真係恭喜晒！
卓妮