政情：范國威亂搬塌樹 郭偉強寸姿勢全錯
「山竹」襲港後，塌樹處處，唔少市民同地區組織都自發清理。有網民喺社交網站分享一張相，係新民主同盟嘅區議員同立法會議員范國威（Gary）落街清理塌樹，點知工聯會立法會議員郭偉強就喺社交網站留言寸爆，話以職安健角度睇，佢哋嘅姿勢錯晒，冇常識到極點喎。
該張相片影到西貢區議員呂文光同Gary試圖合力抬起一棵已倒塌嘅大樹，Gary面部表情十足，顯得極度用力，但棵樹好似郁都冇郁過咁，連郭偉強都忍唔住留言揶揄佢。
唔蹲低「十條腰都唔夠扭」
咁正確搬樹嘅姿勢應該係點呢？郭偉強回覆時話，正確應該要先蹲低身，再抬起重物，如果唔係「十條腰都唔夠扭啊！」佢又話，清理塌樹應該先用鋸將樹幹斬件，就咁搬起真係好危險，但亦唔鼓勵市民自己用電鋸鋸樹，擔心唔識用會出意外，認為政府應該盡快制訂災後清理時間表，等市民有個預算。