中環出更：遊日避過天災 陳鑑光嘆陳國超好彩
近排真係一風未平一風又起，颱風吹襲愈嚟愈強勁，而日本更係接連受到天災影響，喺當地旅遊嘅港人紛紛「逃難」回港。卓妮早前喺馬場遇到仁愛堂前副主席陳鑑光（Charles)，話圓玄學院主席陳國超（超哥）勁好彩，月頭去日本旅遊先後避過風災同地震，返港後大嘆「有佛祖保佑」啊！
Charles話，超哥早前邀請佢同一個慈善團體月初去大阪，不過佢唔得閒冇去，避過一劫，超哥就提早兩日去到當地，颱風「飛燕」襲大阪前，超哥就轉場飛北海道，一到埗就知道關西機場因風災關閉，之後超哥再轉JR落東京，一離開北海道，北海道就發生地震，每次都係剛好早少少離開。Charles又講起，自己外遊都曾經遇過啲危險嘢（口架），幾年前泰國政變有組織通街放炸彈，佢同太太喺當地旅遊，見到有人示威都唔知咩事，依家諗番轉頭先識驚喎。
香港律師會前會長王桂壎就曾經喺台北遇到地震，佢話二○○八年同太太去台北玩，有晚瞓瞓吓覺，成座酒店搖得好勁，衣櫃門「嘭嘭聲」，嚇到佢醒咗衝出去，開頭都唔知發生咩事，之後冇再搖就返房瞓，依家去旅行都會睇吓酒店逃生路線，有事時千祈唔好癲咗咁周圍走。王桂壎太太就話，試過喺上海遇到地震，狗仔會吠，佢提醒大家外遊嘅時候要留意動物咁話。
吳傑莊難忘停飛瞓機場
香港青年動力基金主席吳傑莊就話，試過本來由外國直航飛返香港，點知飛機有問題臨時降落日本，一降落就遇到太大雪要停飛，身上連日圓都冇，瞓咗一晚機場之餘，仲同其他香港人一齊組隊撲機票，相當難忘。
卓妮