政情：鄺俊宇首製陶瓷 楊雪盈唔太收貨
立法會議員鄺俊宇（Roy）尋日去屯門出席陶瓷同樂日活動，仲即席試整陶瓷，而有教開整陶瓷嘅灣仔區議員楊雪盈就不時指點。不過楊對Roy呢位學生嘅表現似乎就唔太收貨喇。
話說Roy將一舊陶泥開窿，搓成一個細容器，仲話製成品可以放喺辦公室，用嚟載萬字夾。不過佢整嘅時候論論盡盡，兩隻手仲好似唔多協調咁。同場嘅楊一睇就話Roy指甲太長，會比較難整陶瓷。Roy聽到就即刻駁嘴，死撐話指甲長先有花紋喎。雖然呢位學生咁百厭，但楊評價時都算畀面，只係話厚薄不一，花紋同心目中嘅有分別，以第一次嚟講算唔錯咁話。
今次係Roy第一次整陶瓷，佢話過往都有做吓紙黏土，最擅長嘅手工藝都係剪剪貼貼，皆因自己由青年中心出身，以前做唔少。被問到會唔會好似經典電影《人鬼情未了》咁，同女友一齊玩陶瓷時，佢就忍唔住笑，仲反問依家咩年代。Roy似乎唔記得橋唔怕舊喇。