政情：黃麗嫦派過期米 「介意唔好拎」
區議員派蛇齋餅糉、派米派糧油都好正常，但講明派「過期」米又係咩玩法？民主黨屯門區議員黃麗嫦上周三喺辦事處免費派包裝意大利米，列明所派嘅米「剛過了最佳食用日期」，而最佳食用日期為今年八月，有屯門讀者就擔心「過期」米會食壞人。
指僅過最佳食用期 損口感
黃麗嫦就話，啲米係由商店轉贈畀區議員同非政府機構，用嚟做食物轉贈，強調只係過咗最佳食用日期，可能口感差啲但食落肚冇問題，話自己試過先派畀街坊。黃又話，唔驚好心做壞事，強調只係唔想浪費食物，如果「街坊介意就唔好拎」，最後仲話啲米已經一早派晒。
根據《食物及藥物規例》，「此日期前最佳」即最佳食用日期，同食物安全冇直接關係，只要適當儲存，即使過咗最佳食用日期食用，都唔代表對人構成危險，同容易腐壞嘅鮮奶等食品所列嘅「此日期或之前食用」係兩回事。不過，始終係「過期」食物，由區議員或政黨派發較為敏感，即使食用後冇事，都容易被對手攻擊及質疑。