政情：長頸鹿條頸幾長？張國鈞帶兩女遊泰考察
正所謂「讀萬卷書不如行萬里路」，為咗滿足個女嘅求知欲，立法會議員張國鈞（Horace）可以去到幾盡？就係帶兩個女去旅行喇。話說佢個女之前問起「長頸鹿條頸有幾長呀？」為咗解答囡囡問題，Horace就同太太帶埋兩個女去泰國嘅動物園睇個究竟，仲齊齊餵長頸鹿添。
「大小二喬」畀口水整濕晒
Horace一向暱稱兩個愛女為「大小二喬」。佢話，小朋友腦內有十萬個為甚麼，喺能力許可之下，佢都希望大喬同小喬可以自己去搵問題嘅答案。佢又話，大喬最鍾意獅子，小喬就愛大象，雖然最想係去非洲睇真正嘅野生動物，但考慮到兩個女年紀仲太細，所以就去泰國「睇住先」咁話。而兩個女見到長頸鹿一啲都唔驚，仲好興奮添，就算畀長頸鹿啲口水搞到成身濕晒都冇有怕。
Horace又話，喺泰國可以揸車入動物園，近距離睇獅子、大象等野生動物，兩個女都睇得非常入神。雖然入場前佢都擔心過安全，但後來發現園內動物都唔太理啲車，只要唔亂走出車廂都十分安全喎。