中環出更：追唔到北極光羅少雄嘆保險唔包
北極光絢麗多彩，每年都吸引唔少人專程去北極圈欣賞，不過睇唔睇到始終講運氣，好似國際專業保險諮詢協會會長羅少雄幾年前都試過追北極光，但遺憾地無功而返，大嘆如果有保險保障睇到北極光就好喇。佢呢個諗法又幾吸引喎。
羅少雄日前出席活動時話，曾經專程去芬蘭睇北極光，但逗留咗幾日都睇唔到，所以之後就去被譽為最易睇到北極光嘅加拿大黃刀鎮再接再厲，終於成功睇到。佢認為睇北極光純講運氣，事前只知睇到嘅機會率，唔會有百分百確定可以睇到北極光，所以希望保險保障實睇到北極光都只係講笑啫。
近期香港人嘅旅遊勝地日本先後受颱風同地震影響，令人關注旅遊保險嘅重要性，羅就話旅遊保險愈早買愈好，最好買機票時買埋，否則出發前當地出現天災，就無法得到保障喇。
洪為民試過歐洲寄失行李
菁英會榮譽主席洪為民外遊都有買旅遊保險嘅習慣。佢又話，以往曾經申索過旅遊保險，主要都係同行李寄失有關，其中最難忘嘅係有次去歐洲旅行時，兩件行李全寄失，要喺當地買內衣褲替換，其中一件行李仲要旅程結束、返到香港後一個星期先收到，好彩嗰件行李入面並非日用品。佢之後都吸取經驗，每次搭飛機都會將充電器同藥物隨身攜帶。
當日活動係表揚女企業家獎項嘅啟動禮，有份合辦頒獎禮嘅香港中小型企業聯合會會長麥美儀，協辦嘅生產力促進局總裁畢堅文都有出席撐場。
麥美儀認為，女性企業家要兼顧家庭同事業，難度較男性大，但近年女性企業家數目有上升趨勢，估計係因為唔少家業由女性承接，而男性就較有冒險精神去創業喎。
卓妮