政情：今日你上鏡：何啟明楊彧着情侶裝心有靈犀

撞衫對女士嚟講係大忌，相反男士們似乎冇乜所謂喇。深水埗區議員何啟明同楊彧，尋日出席一個公開場合時就不約而同着咗同一款嘅橄欖綠色Ｔ恤同黑色褲，惹來「Hehe」疑雲。何啟明就解畫，話佢哋冇夾過，但大家都買開同一個日本牌子嘅衫，所以啲衫嘅款式都差唔多，仲自爆大家着嘅尺碼都係一樣添，但就好少會咁樣一齊着喎。不過，兩人身形差唔多，而且都係戴眼鏡，影相咁「親密」，令人覺得佢哋係「Hehe」都唔出奇。