政情：街坊躁上加躁 斥派爛荔枝 林紹輝：冇收到投訴
一把荔枝三把火，但有區議員唔怕街坊食得多熱氣，向街坊派發荔枝，仲每名街坊可以攞一籮咁多添。不過有拎咗荔枝嘅人就投訴，辛辛苦苦拎完荔枝，先至發現當中有唔少已經爛咗，谷到成肚氣咁話，仲質疑呢位區議員咁做，係嫌班街坊唔夠躁底。究竟邊個向街坊派爛荔枝呢？
有讀者爆料話，葵青區議員林紹輝尋日喺區內派發大量荔枝，每人可以獲取一大籮，不過大熱天時排完隊，先至發現獲派發爛同發臭嘅荔枝，所以掉都掉唔切。因為好多荔枝都出事，最終就搞到邨內出現大量垃圾，連垃圾桶都塞滿荔枝，污糟邋遢。
曾派薯仔蔬菜都冇問題
林接受查詢時話，佢只係協助慈善團體派發食物，過往都派過薯仔、蔬菜等，冇出現過問題，今次亦冇接到投訴，反而有人讚荔枝OK。佢又強調，派發過程有人員呼籲街坊注意衞生，又講明食物來源，雖然今次唔係佢第一次因派食物而惹是非，但都會繼續搞，仲反問食物安全，唔通掉晒落堆填區咩。
#