政情：新田購物城獲3年續命 象哥被睇死續拍烏蠅

剩半年租期 商家唔敢入場

城規會尋日下午審批新田購物城用地嘅續期申請，象哥喺早上嘅電台節目話，購物城今年初先至完成籌備及招租事宜，但係因為距離屆滿日期只剩約半年時間，所以搞到好多商家都覺得投資有風險，唔夠膽入場，依家購物城租戶可以話係「十室九空都未達到」。不過，佢認為政府部門都冇理由反對續期，因為購物城獲得續期三年後，相信經營情況就會有所改善。

鄰近落馬洲口岸嘅新田購物城佔地四十萬平方呎，二○一五年九月獲城規會批准改劃用途，當時嘅原意係分流內地旅客，減輕北區居民面對水貨客同內地旅客逼爆當區嘅壓力。不過，購物城拖拖拉拉近三年先至開業，內地去年都已經將深圳戶籍居民來港由「一簽多行」，改為「一周一行」，逼爆情況都已經紓緩。內地客同水貨客減少，唔通購物城要變身做本地人生意？

欠吸引力 新田居民都唔吼

不過，咪以為新田購物城可以靠「內需」，莫講話住喺市區嘅香港居民覺得山長水遠，就連本身住喺新田嘅鄉紳都話唔吼，仲睇死購物城續到期之後都係「靜英英」。事關新田村民一向都係慣咗去元朗大馬路消費同購物，直言約朋友飲完茶，自然就喺嗰度買埋嘢先返新田，元朗大馬路已經應有盡有，變相新田購物城毫無吸引力。

新田購物城有二百幾個舖位，造價高達一億五千萬元，如果遊客又冇，本地居民又唔去幫襯，象哥三年以來花費嘅心機就真係凍過水，出錢嘅亦血本無歸。城規會尋日通過新田購物城用地續期後，象哥就話承諾會加強招商同宣傳，相信到時商戶有信心承租，購物城經營情況會改善喎。