政情：沙田區會撐特權法查沙中線 民記大亂投晒贙成反對票
港鐵沙中線工程接二連三爆出醜聞，政黨追究責任，至今已經由立法會發展到區議會層面，但建制派喺區議會中人數佔優，可以減慢火勢蔓延速度。不過，前日沙田區議會交通及運輸委員會會議，竟然通過支持立法會考慮引用《立法會（權力及特權）條例》（特權法）去徹查港鐵沙中線工程嘅動議，當中民建聯（民記）兩名區議員倒戈投票支持，與該黨喺立法會保駕護航嘅立場迥異。
沙田區議會有三十九名議員，建制派佔二十席，僅比泛民多一席，如果當日會議冇人倒戈兼全部建制派在席，有關動議係難以通過。不過，民記副主席彭長緯缺席投票，同屬民記嘅李世榮同余倩雯就投下贊成票，未有跟隨董健莉、黃冰芬、招文亮及王虎生四名黨友投反對票，民記今次未有統一投票取態，都算係罕見情況。
當日會議由下午兩點半開始，有關動議大約喺晚上九點幾進行投票。據了解，彭長緯去到投票前先因要事逼住離開而缺席投票，而呢個動議經過多番修訂，到最後要求立法會考慮引用特權法調查沙中線工程，同時又要求政府檢討獨立調查委會員及擴大其職能，有區議員就形容多番修訂搞到個動議不倫不類。
葛珮帆：僅叫立會「考慮」 無衝突
投下反對票嘅董健莉就話，李世榮需要主持會議，所以投票前無法同佢商量，坦言見到投票結果時都有啲錯愕，但就認為只係大家執着嘅地方唔同啫，因為佢主張先交調查委員會處理。另外，李世榮事後有向黨友解釋，而佢接受查詢時就話，動議用上嘅字眼係「考慮」而非「促請」，又冇講明幾時要引用特權法，所以先投下贊成票喎。
民記新界東立法會議員葛珮帆都有了解情況，佢話當日會議時間長，議員不停出出入入，再加上李世榮要主持會議，所以黨友之間嘅溝通先會「甩甩哋」。佢認為今次投票結果唔代表民記冇共識，因為該黨立場清晰，向來要求擴大調查委員會調查範圍，若然調查結果不滿先唔排除用特權法，而且今次通過嘅動議只係叫立法會「考慮」，所以不論投贊成定反對都冇衝突喎。
其實今次動議以二十票贊成、十五票反對獲得通過，雖然即使民記兩名議員冇倒戈都唔能夠挽回大局，但既然該黨認為要先交政府嘅調查委員會處理，未有結果前係咪理應堅持反對引用特權法調查呢？依家搞到咁咪肉酸囉，民記真係要研究點樣改善溝通喇。