借問瘟君欲何往，紙船明燭照天燒。好快就係農曆七月十四，咁啱得咁蹺，今個鬼節傳來壹淫媒旗下嘅台灣《爽報》即將爽死嘅好消息。睇嚟港台兩地嘅市民都好唔得閒，啱啱燒完元寶蠟燭畀遊魂野鬼啫，轉個頭又要準備蠟燭紙船送《爽報》一程咯。
係咁嘅，因為長期虧損及國際紙價上漲，傳聞壹淫媒高層決定台灣《爽報》將步香港《爽報》爽死嘅後塵，今個月出版埋最後一期就會摺埋。空穴來風，未必無因，雖然台蘋社長早排死雞撐飯蓋，大大聲否認爽死，之但係台蘋早就自身難保，仲話要裁員兩成同埋將岡山印刷廠拉閘。壹淫媒莫財成咁、燶成咁，《爽報》爽死仲邊有彎轉吖。
多行不義必自斃，台灣《爽報》不得好死，一啲都唔令人意外。你知喇，漢奸黎做埋咁多陰騭嘢，早就被市場唾棄，陷入窮途末路，出售港台《壹週刊》爛尾收場，不過係壓垮駱駝嘅最後一根稻草咋。有辦你睇，自從單刁衰咗，「親生仔」香港《壹週刊》摺書唔在講，有廿年歷史嘅《飲食男女》亦得番數碼版苟延殘喘，至於多年來被契弟爽死嘅《壹本便利》、《忽然1周》、香港《爽報》等等，早就喺堆填區屍骨無存。連台灣《壹週刊》早前都結束紙本發行，《爽報》又點可能例外。
最抵死係，漢奸黎曾經拍晒心口自誇數碼業務有得搞，要全力催谷，到頭來吹者自吹，讀者眼睛雪亮，根本唔賣帳。睇吓盤數咪知囉，數碼業務年度虧損超過四千四百萬元，按年擴大逾三十五倍，遲早瓜得。唔係講笑，壹淫媒一年虧蝕近五億元，八年來夾埋蝕咗成二十億元，流血不止都不足以形容。家陣股價得番兩毫幾子，隨時躋身仙股行列，仲有近五億元未償還銀行借貸，簡直係資不抵債，漢奸黎周身唔得掂，莫講話賣仔，連老婆都可以出賣，睇怕喺港台吊吊揈嘅爛果報，好快都殊途同歸咋。
呢啲咪叫「條路自己揀，趴街唔好喊」囉。漢奸黎多年來立壞心腸，為外部勢力充當帶路黨，反中亂港唯恐不及，仲出錢出力搞違法佔中，舊年更公然辱罵恐嚇東方記者，擺明禍港殃民，視法治如無物。本來呢，契弟恃住有洋人條大水喉射住，要風得風，要雨得雨，點知白宮換咗主人，根本唔睇佢台戲，狗餅都分唔到半塊，有咁耐風流，有咁耐折墮，怨得邊個呀。
嗱，上帝要壹淫媒滅亡，必先要漢奸黎瘋狂。繼秦檜、吳三桂、汪精衞等大漢奸被釘上歷史恥辱柱後，輪都輪到漢奸黎嘞，大家買定紙船蠟燭，同契弟講聲好行夾唔送喇。