政情：頭髮禿咗忽 鄧家彪鬼剃頭疑雲
都市人壓力大，有人會因而無端端無咗忽頭髮，患上鬼剃頭，而尋日見到立法會前議員鄧家彪（Bill），發現佢左耳後面冇咗忽頭髮，問起時佢又好驚訝叫「哎呀，未生番喎」，唔通佢都有壓力問題？
割後腦粉瘤留疤
阿Bill強調自己心靈好健康，完全無問題，只係因為四年前接受外科手術，將後腦嘅粉瘤割除後留有疤痕啫，完全唔關鬼剃頭事喇！而佢過去幾年都習慣，剪髮時唔將疤痕附近剪太短，用頭髮遮住疤痕，但今次竟然唔記得提醒髮型師而搞到現形囉！
佢更大嘆依家好肉酸，好彩自己望唔到條疤痕，惟有等頭髮生長番冚住，不過就冇用其他方法加快頭髮生長速度，睇嚟佢都唔算太貪靚喎。佢更透露，今次剪頭髮係為咗配合一班小花影相，希望短啲同斯文啲襯番佢哋，但最後因剪得太匆忙先搞到現時咁樣。