政情：執業風波廉署唔查 何君堯甩難
立法會議員何君堯舊年被指自稱為新加坡、英格蘭及威爾斯執業律師，但並冇喺新加坡及英國執業，有虛報資料之嫌。其後新民主同盟等多個團體更就事件向廉政公署舉報。事隔約一年，消息指，廉署已決定唔再就案件進行調查，咁即係甩難喇！
律政司指證據不足
新同盟喺舊年九月到廉署舉報，指何喺選舉通函上聲稱自己係「英國執業律師」，係同事實不符，已涉觸犯《選舉（舞弊及非法行為）條例》。有份舉報嘅荃灣區議員譚凱邦確認，已收到廉署回覆指唔再調查何君堯。
盧俊宇擬提出上訴
同樣有份作出舉報嘅民主黨社區主任盧俊宇話，對於廉署嘅決定感到憤怒。佢話何君堯喺選舉時自稱新加坡、英格蘭及威爾斯執業律師，當選後加上「資格」，認為係白紙黑字證明，所以佢將與法律團體商討，會考慮提出上訴。
廉署回應查詢時證實，已就早前接獲有關何君堯嘅投訴完成調查，並向律政司徵詢法律意見，律政司認為證據不足，決定唔會向涉案人士作出檢控，又話已喺上月二十五日就有關調查向獨立嘅「審查貪污舉報諮詢委員會」匯報，委員會同意廉署嘅調查結果。