政情：外賣APP涉違規 徐英偉幫襯斷正
潮流新興用手機外賣APP，打工仔女提早一日已經睇到餐單嗌外賣，翌日再到指定服務站攞飯。不過，早前經本報追查發現，呢類服務站「零監管」，仲有食物安全隱憂添！而位處金鐘連接政府總部同立法會嘅海富天橋亦有一個服務站，本報記者最近就影到勞工及福利局副局長徐英偉（Caspar）幫襯呢類無規管嘅外賣服務。
相關外賣自取服務站每日接近中午十二時就會「擺陣」，開兩張摺枱放外賣，再由三名員工負責「派貨」，到一時許就會「收檔」。採訪當日，有不少掛上政府總部職員證嘅人士，以及立法會職員絡繹不絕去攞飯，大多數人要湯麵或肉餅飯。
服務站合法與否唔清楚
至接近中午一時，戴上眼鏡嘅Caspar，狀似輕鬆咁由政府總部行出來，直接到服務站取出手機顯示訂單攞飯。整個流程順暢，一睇就知佢係熟客，當佢轉過身發現有記者後，即面色一沉。
點解用APP買飯？Caspar直言「方便」同多款揀，慨嘆平常在政府總部餐廳買飯多人排隊，但工作繁忙，用APP就可以節省時間。佢又話，唔太清楚服務站係咪合法，強調如果無違規都可以推動飲食業，仲透露考慮過促成社企同APP合作添！對於要否檢視法例，佢就話交畀相關部門跟進。
倘食物中毒 無法例規管
食物環境衞生署回覆查詢時，確認接獲一宗投訴，同外賣平台喺海富天橋設服務站有關，已派員調查，有關個案正在處理中。至於有咩法例規管，食環署發言人就解釋，可引用《食物業規例》或《公眾衞生及市政條例》，可能涉及阻街、無牌小販、未獲批准貼海報等事項。早排有人食完啲外賣後，懷疑食物中毒，但上述法例無一條係可以針對性規管。
對於呢類飯盒服務嘅出現，就惹來一群喺金鐘附近經營飲食業嘅商戶極為不滿，事關舖位租金貴，又要攞牌先做到生意，相對喺天橋擺檔唔使交租兼無王管，仲要有高官幫襯撐場添，商戶唔火滾就奇喇！科技日新月異，同生活緊密相連，政府卻經常視而不見，Caspar作為問責團隊之一仲幫襯埋一份，佢理應一早察覺問題要求團隊處理，否則他日爆大鑊就唔知點收科嘞！