狗咬人唔係新聞，人咬狗至係新聞，正如本港大型基建甩甩漏漏唔係新聞，順順利利至係新聞。好似西九文化區M+博物館咁，最近就有指項目承建商陷入財困被終止合約，分分鐘進一步延誤超支，結果又係搵着納稅人嚟搞。
根據西九文化區管理局所講，承建商中標嘅五十九億元工程合約，至今只係完成六成左右，終止合約後另聘承建商執手尾，預期最少都要兩個月，趦趦趄趄搞得嚟，睇怕都冇乜可能如期二○二○年完工。話時話，M+博物館工程本身已經多災多難，家陣再橫生枝節，會唔會爛尾收場，真係冇人話得埋。不過咁，涉事承建商就另有說法，否認財困之餘，仲話冇收過西九管理局終止合約嘅正式通知，市民聽到一頭霧水，都唔知搞邊科。
家陣最大鑊嘅係，除咗M+博物館，涉事承建商手上仲有多項政府工程，如果「一爛俱爛」點樣收科？面對質疑，官老爺例牌大派定心丸，強調工程進度順利，又話必要時可以從認可公共工程承建商名冊中除名喎。官僚靠得住，豬乸會上樹，官老爺有做好自己份工，沙中線就唔會淪為豆腐渣工程喇！
當然喇，講到懶懶閒閒，唔嗲唔吊，西九管理局班洋人高層都係一擔擔。有立法會議員兩度追問M+博物館會唔會出現延誤及超支，當時管理局拍晒心口包喺佢哋身上，結果係點有目共睹。查實洋人項目監管總監司徒澤民自己都承認，舊年二月至今年年中，管理局已向分判商直接支付總數十五億元工程費；而同樣係洋人嘅行政總裁栢志高，就話同承建商解約係因為對方今年五月違約，既然管理局一早知有問題，點解拖足年幾至做嘢？唔通班洋高層一個二個坐擁高薪厚祿，卻好似某建制派議員咁講，「Dreaming on their office」？
如果讀者唔善忘，一定記得呢句「金句」係用嚟招呼港鐵前行政總裁韋達誠，當年佢老哥因為冇如實匯報高鐵嚴重超支兼延誤，搞到畀議員鬧爆兼提早執包袱。睇番西九管理局之前兩任洋老總，英國嘅謝卓飛同澳洲嘅連納智，唔係藉口自己有病，就係以「思鄉」為由劈炮唔撈，現任嘅栢志高喺香港為官多年，以為熟悉本地情況，唔會再好似上兩手咁「水土不服」喇，點知一樣賴嘢，再次證明洋和尚唸起歪經上嚟，沒有最大鑊，只有更大鑊。
冇計喇，古人教落「用人唯賢」，港府偏偏「用人唯洋」，唔理好醜，但求外國面口，公營機構專用洋人，大型基建專用洋公司，連有洋大人照住嘅漢奸賣港賊都買佢哋怕。成日話香港人心未回歸，好心嗰班黃皮白心嘅高官檢討吓自己先喇！