政情：林鄭直播狂吸嬲 避同志議題捱轟
特首林鄭月娥前晚喺社交平台搞直播，點知呃Like（讚）唔成之餘，仲「吸」咗幾千個「嬲嬲」，兼被批評揀問題嚟回應，避開難答嘅問題。多個同志團體尋日更聯署炮轟林鄭對同志議題視而不見，觀眾提及同性戀同跨性別議題嘅留言多達四百七十次，平均每分鐘出現九次，但有關問題完全被無視，令佢哋深感失望咁話。
網民亦關注單程證及房屋問題
有同志團體將所有林鄭直播時嘅留言同被選出嘅問題進行分析，話四十八分鐘直播期間，網民嘅提問中涉「單程證」一詞嘅有五百七十二次，係「網民關注之首」，其次就係「性傾向」，跟住先係「房屋」同「土地」。但有關同志嘅留言問題就一次都冇被選中回應，反而有關「學生壓力」同「選修科」等，只係出現一次就被提及喇。
同志團體鬧爆林鄭對同志議題視而不見，質疑係咪預先夾好唔答同志問題。佢哋又要求林鄭落實競選時嘅口號，同性小眾社群嘅香港人同行，聆聽同志同跨性別人士嘅聲音，消除社會嘅恐懼同誤解。