中環出更：梁耀忠終與勞工組和平分手
街坊工友服務處（街工）勞工組糾紛持續咗幾個月，矛頭直指街工立法會議員梁耀忠（阿忠）想炒人，由於會內有人不滿阿忠嘅處理手法，最終引發街工退會潮。不過，事件終於告一段落喇，事關勞工組三人譚亮英、王曉君及黎治甫已經同街工達成協議，並於前日離職。唔知呢個結局，對阿忠嚟講算唔算甩難呢？
街工稱協議下離職
譚亮英尋日話，佢哋勞工組三人經街工會員胡偉忠作中間人，已同街工達成協議，喺前日離職，而街工方面已澄清佢哋並非被解僱，而係「協議下離職」，街工亦已出足糧，佢哋亦獲發長期服務金。譚又話，既然大家已經合作唔到，分開都係合理。被問到將來有乜打算，佢就話想做番同勞工相關嘅工作，所以佢同王及黎都構思緊一齊成立新平台。
自五一勞動節爆出勞工組糾紛，事件至今已經超過三個月，對於主打勞工權益問題嘅街工而言，真係元氣大傷，難怪阿忠都話，雖然佢冇參與今次協議，但今後大家唔再爭拗同互相攻擊，冇拖冇欠就係最好嘅結局。
卓妮